Die tweetalige Afrikaans/Engelse en Engels/Afrikaanse Kuberwoordeboek is sopas deur Protea Boekhuis (Pretoria) bekend gestel. Met prof Christo Viljoen as redakteur, in medewerking met prof Niek du Plooy en Samuel Murray, was die daarstelling van die woordeboek 'n projek van die Vriende van Afrikaans. Ruim finansiële ondersteuning is gegee deur die Taallessenaar van die Afrikanerbond.
Die Kuberwoordeboek is die eerste hersiene woordeboek op die terrein van die informasietegnologiebedryf sedert die verskyning van die Tweetalige Rekenaarwoordeboek van N Coetzee, NF du Plooy en AD de V Cluver in 1987. Hierdie baanbreker-woordeboek het egter verskyn voor die koms van die internet, en vakterme wat vandag roetinegewys in die internet en informasietegnologie gebruik word, verskyn nie eens in die oorspronklike werk nie. Dié vakgebied ontwikkel só snel dat twee tot drie nuutskeppings weekliks tot die Engelse woordeskat toegevoeg word.
Dus, as jy wil weet wat die Afrikaanse ekwivalent van "phising", "blogging", "surfing" of "google" in Afrikaans is, behoort die Kuberwoordeboek op jou boekrak te wees.
Die Kuberwoordeboek beslaan 518 bladsye en is verkrygbaar teen R250 by Protea Boekhuis, Pretoria.