|
 |
|
|
|
|
WIE IS DIE VRIENDE VAN AFRIKAANS? DIE VRIENDE VAN AFRIKAANS beywer hulle daarvoor om Afrikaans in ons woon- en werkplekke tot sy reg te laat kom, en die geleidelike afskaling van die gebruik daarvan in die openbare en korporatiewe wêreld aktief teen te werk. Die Vriende is 'n onverbonde
groep mense: nie-polities, nie-seksisties, nie-rassisties en nie-godsdiensvoorskriftelik.
Ons is nie teen enige taal nie, maar ons is pront, onbeskaamd, onverskonend
pro-Afrikaans. Ons voer hierdie aksie sonder enige vergoeding.
Ontstaan en vordering daarna Die Vriende van Afrikaans het op 8 Februarie 1994 op Stellenbosch tot stand gekom. ‘n Klein groepie Afrikaanssprekendes het saam besin en hulle diepe kommer uitgespreek oor die wyse waarop Afrikaans by die venster uitgegooi word, nie net deur die owerheid nie, maar ook deur verenigings en sakeondernemings. (Talle van hierdie sakeondernemings behoort aan Afrikaanstaliges wat skynbaar onder die valse indruk verkeer dat dit tot hulle onderneming se voordeel strek om dit in Engels te bedryf.) Onder die groepie beswaardes was prof. Johan Combrink, voorste taalkundige in die land en ‘n vurige kampvegter vir Afrikaans. Hy was ‘n uitmuntende spreker en het die saak vir Afrikaans op treffende wyse tuisgebring. Uitnodigings om groepe Afrikaanssprekendes toe te spreek het ingestroom van oral in die land. Hy het gewoonlik van die
geleentheid gebruik gemaak om daar en dan ‘n tak van die VVA in die lewe
te roep. So is daar op ‘n groot aantal Bolandse dorpe, maar ook op ander
plekke, takke van die VVA gestig.
Onder sy aanvoering is die hoofkantoor van die VVA op Stellenbosch gevestig. Vanuit dié kantoor het hy die werk van die talle takke wat tot stand gekom het, gekoördineer en hulle gereeld van toepaslike leesstof voorsien, die meeste waarvan hy self voorberei het. Johan Combrink is nie meer daar nie, maar die werk van die VVA waaraan hy die laaste jare van sy lewe met oorgawe gewy het, moes voortgaan. Sy vrou, dr. Louise Combrink, is tans die nasionale voorsitter van die VVA. Haar akademiese agtergrond as senior dosent in die Opvoedkunde aan die Universiteit van Stellenbosch maak haar ideaal geskik om die leiding te neem en sy doen dit met groot toewyding en waardigheid. Mnr. Gideon Joubert is die nasionale koördineerder en die spitsraad bestaan verder uit mnre. Nolte Smit en Willem Dempsey en mee. Phia van der Westhuizen en Amanda de Stadler. Die VVA is tans in die proses om as ‘n Artikel 21-organisasie geregistreer te word. Ons het dus ons eie grondwet en staan bekend as ‘n weldaadsorganisasie. Ons Ledevergadering kom minstens vier keer per jaar byeen. Die kantoor is in die gebou van die WAT in Banghoekweg 115 en word beman deur mev. Amanda de Stadler as uitvoerende beampte. Mev. De Stadler het as onderwyseres, redigeerder en vertaler, wye ervaring op die gebied van Afrikaans opgedoen. Sy was ook medewerker met die opstel van die Groot Tesourus van Afrikaans. Haar taak by die VVA is tweeledig: sy behartig al die administratiewe take en verteenwoordig ook die VVA by vergaderings en aksies waar daar oor Afrikaans beraadslaag word en besluite geneem word. Sy is ook verantwoordelik vir die Doendinge, die VVA se nuusbrief wat ses keer per jaar verskyn.
Om 'n kleinsakegeleentheid te bevorder deur die stigting van Boekrakwinkels, waardeur Afrikaanse boeke op kleiner skaal (veral in die platteland en in kleiner gemeenskappe) beskikbaar gestel kan word in 'n bestaande onderneming, bv. 'n boetiek, koffiekroeg, apteek, kruideniers- of klerewinkel. Lees hier meer oor dié projek van die Vriende van Afrikaans. Nuwe
boek: Afrikaans, lewende taal van miljoene
Die projek wat in die boek sy neerslag gevind het, is aangevoor deur die Vrydaggroep, 'n landswye studiegroep wat hulle toele op studies in verband met Afrikaans in sy veeltalige opset. Die redakteur, vroeër verbonde aan die RAU, was die projekleier. Die titel van die publikasie is ontleen aan 'n hoofartikel in die London Times van 29 April 1994, twee dae na die aardverskuiwende verkiesing, onder die Afrikaanse opskrif "Reg vir die toekoms." Na Afrikaans is verwys as "lewende taal van miljoene". "Afrikaans, Lewende taal van miljoene" kos R89-50 (plus R30-00 vir posgeld en verpakking) en kan bestel word van: On the Dot VerspreidingBankbesonderhede: ABSA Bank, Takno: 334910, Rekeningnommer: 1450 153 644 STIG ASSEBLIEF 'N TAK VAN DIE VRIENDE VAN AFRIKAANS IN U OMGEWING, OF WORD SELF 'N LID. Klik
hiervir
die aansoekvorm in .html formaat
Skryf aan ons per land- of e-pos, of faks, of skakel. Een van ons sal selfs probeer om 'n stigtingsvergadering by te woon. Volle besonderhede oor die stigting van 'n tak van die Vriende van Afrikaans is hier beskikbaar. Nasionale Voorsitter van die Vriende van Afrikaans: Dr. Louise Combrink
Moenie wag nie. Doen asseblief dadelik iets vir Afrikaans. Laat ons asseblief weet as u 'n lid wil word of 'n tak wil stig. 'n Aansoekvorm vir lidmaatskap van die Vriende van Afrikaans kan afgelaai word deur hier te kliek of alternatieflik hier. Ons wil graag met u in aanraking kom en bystand verleen. Lees hier van die aktiwiteite van die Vriende van Afrikaans op George. Die jongste nuusbrief DOENDINGE van die Vriende van Afrikaans is hier beskikbaar. |
|||||||||||||||||||||||||||
